von

Dr Zeedel 2015

Wie immer ohne wirkliche Veröffentlichung. Und: Er ist nicht von Andreas Thiel verfasst!

Zeedel F-2015

Fasnachtsgesellschaft Frauenhilfswerk 1833

Sujet 2015: 47 Joor Schulmädchenreport

In de 70ger Joor in dunggle Nächt, au gärn bi Rääge Streeme Männer mit Huet und hooche Mantelgrääge Ins Kino Clara am gliichnaamige Blatz
Si sin ellai underwäggs – ganz ohni dr Schatz

Si bassen uf, as e kaine si kennt
As men in kain, wo me kennt, iinerennt
Was isch denn deert so Ghaims am laufe
As sich die Type därart mien vrschlaufe?
S isch e Film wo braavi Birger duet vrsteere
Wo Sache zaigt, wo sich schyynts nit gheere
Uf dr Liinwand gseht me bluddi Brischtli hipfe
Won em Kinogänger s Pfyffli lipfe
Und wär guet luegt gseht au e bitzli
Dur d Baumwulleheesli die buschigi Fitzli
Vo däne ungattige Maitli wo sich aanegän fir dä Schund Und d Männer hoggen im Kino fir mänggi Schtund

Schuelmaitli Report het das Filmli ghaisse
Wo alli Männer gehn go gnaisse
I ha mi e paar Jeerli älter gmacht
Biau go luege und s Härz het mr glacht
Won i gseh, wien e Schielere in ere sexy Tracht Ihre Brofässer mit em e Strip aamacht

Und wenn denn d Brischt im Gsicht vom Lehrer lande Isch mr amme nid numme dr Vrstand stillgstande.
Me het s as Ufklärigsfilm vrstande welle wisse
Aber i glaub, me het is do e weeneli bschisse

Wie kennts mit däne Report-Film anderscht si E Vorlaifer sin si gsi, vo dr Pornographie

Hit isch s iblig as me Meps und Mepsli ka gseh
Au – underdesse – rasierti Meesli dien kaim me weh Fidli au, eb grooss, eb glai
Eb si z zweit im Bild sin oder ellai
Im Kino, im Heflti, im Färnseeh, in dr Badi
Me luegt au im Internet eb Maa, eb Pfadi
S isch wirgglig efang dr blutti Wahn
Bsunders dr Arsch vo dr Frau Kardashian

S gheere Fudi, Pfyffli, Brischt und Schnäggli Zer weschtlige Folklore as ganzes Päggli Gnau wie suffe, rauche, Musig, danze

Bulimie oder ebbe halt e digge Ranze

Party mache, d Morge-Mässe grad vrgässe Lieber zem Kater-Zmoorge Rollmeps frässe Biecher duet hyt e kain me lääse
Bis uf ai Buech, ains vo bsunderem Wääse Deert stoht drin was Gott vrbotte

Und was mir gar nid mache sotte
Das Buech het vrwirrendi Väärsli drin
Kuum ebberem erschliesst sich ihre Sinn
Drno duet soone bärtige Zausel wättere
Sie miesse sich verhille, all die Dschäddere
Wo z viil Hut dien zaige und us Männer gaili Esel mache Und dä maint das denn grad gar nid zem lache
Die „Gottesmänner“ stachle d Massen uff
Die Masse wärde furchtbar muff
Schreyen wirrs Ziig bim demonschtriere
Si finde Fraue gruusig will si menschtruiere
Und in Sägg sölle d Wyyber gfälligscht ummelaufe
Am beschte sich deheim in dr Kuchi vrschlaufe
Und wehe soone Wyyb foht amänd aa muurre
Denn gits zerscht emool e baar uf d Schnuure
Die Type segglen umme, vrbrenne Fähne, mache Zoff Gärn au mit dr Panzerfuscht und dr Kalaschnikov
Do wird’s mr ibel und s macht mr Angscht, e bitzli Drum dängg i lieber wider zrugg an d Fitzli
Wo me doozmool im Kino het kenne go bschaue
Das ka men au wirgglig viil besser vrdaue
As Mord und Gwalt uf unsere Stroosse
Wäge däm Mittelalter-Quatsch mit Soosse
E nätte Grubbesex us de 70ger Joor
D Maitli mit Bliemli in de duurgwällte Hoor
D Männer – hoocherotisch – mit wysse Sogge
Und ich due vrdraimt im Kino hogge

De bärtige Männer im wallende Gwand
Us em fäärne Moorgestrai….nai ….land
Gfallt unsri Art z lääbe nid, dien drwääge unverhole Lyt umbringe, numme will die gritischi Bildli moole Lehnd is doch mache, wie as es mir fir richtig halte Was ihr glaubet, diend bitte fir eych sälber bhalte Und i sag s eych klar, so wie s muess sii…..
….moi aussi – je suis Charlie !

Am Fasnachtszyschdig ka me uf em Minschter- nid uf em Tahirblatz, go d’Kamel….nai d Ladäärnenusschdellig go bschaue. Ämmel dis Joor no. D Frau Fasnacht isch grooss !

Disclaimer: Der Zeedel gibt keine Meinung wieder, auch nicht die des Fasnachts-Comités, der Sujet-Kommission der Alti Richtig oder von Bundesrat Ueli Maurer (obschon, so sicher sind wir da letztlich doch nicht).